छालाको प्रकृति अनुसार कस्मेटिक सामाग्रीको प्रयोग किन जरुरी ?

हामी सुन्दर बन्न चाहन्छौं। अरुले राम्रो भनेको वा सुन्दरताको वर्णन गरेको सुन्दा रमाइलो लाग्छ।

प्राकृतिक रुपमा हामी सवै सुन्दर छौँ । अझ बढी सुन्दर देखिने चाहना वा उमेरसँगै सुन्दरताको व्यवस्थापन गर्न विभिन्न सौन्दर्य उत्पादन पनि बजारमा छ्यापछ्याती छन् । कुनै न कुनै रुपमा महिला पुरुष दुबैले ती कस्मेटिक साधन प्रायेग गर्दै आएका छन्।

तर सुुन्दर बन्न प्रयोग गरिने कस्मेटिक सामाग्रीले हानी गरिरहेको हुन सक्छ । महङ्गो र नाम चलेको क्रिम लगाउँदैमा सुन्दर बन्ने भ्रम पनि छ । तर, हाम्रो छालासँग मिल्ने कस्मेटिक प्रयोग गर्न जानिएन भने सुन्दर बन्ने नाममा कुरुप बनाउन बेर लाग्दैन।

कसैले हामीलाई यो क्रिम लगाए राम्रो देखिन्छ वा छिटो गोरो÷गोरी भइन्छ भन्यो भने हामी अरु केही नसोची क्रिम किनेर प्रयोग गर्छौं।



राम्रा ब्राण्ड वा कम्पनीले बनाएका क्रिमलगायतका सौन्दर्य उत्पादन पनि सबैलाई एकै खालको प्रयोग गर्न मिल्ने खालका हुँदैन।

छालाका विभिन्न प्रकृति अनुसार कस्मेटिक साधन उत्पादन गरिएका हुन्छन् । जस्तो, चिल्लो, फुस्रो, सामान्य, मिश्रित छालालगायतका छालाका प्रकृतिअनुसारका छुट्टाछुट्टै कस्मेटिक साधन बनाइएका हुन्छन् । त्यसैले आफ्नो छालासँग मिल्ने कस्मेटिक प्रयोग गरिएन भने समस्या सिर्जना हुन्छ।

आफ्नो छालाको प्रकृति थाहा नपाइ अरुको सिफारिस अनुसार क्रिम प्रयोग गर्ने र पछुताउने धेरै देखिएका छन्।

अर्कातिर बजारमा सक्कली ब्राण्डका नाममा थुप्रै कमसल उत्पादन पाइन्छन् । नेपालमा पाइने केही सौन्दर्य प्रसाधन कमसल खालका छन्। जसले हाम्रो अनुसारको छाला बिगारिहेका छन् ।
नेपालमा पाउने सबै सौंदर्य  प्रसाधन नक्कली मात्र छैनन् । राम्रा कम्पनीका साधन पनि छन् । तर कमसलका नआउने भन्ने होइन।

सौंदर्य साधन प्रयोग गर्नै हुँदैन  भन्ने धारणा पनि गलत हो । पहिले महिलाले मात्र राम्री हुन कस्मेटिक लगाउँछन् भनिन्थ्यो । तर आजकल पुरुषले पनि धेरै कस्मेटिक प्रयोग गर्छन् । त्यसैले कस्मेटिक हाम्रो जनजीवनमा चाहिने कुरा हो चाहे कम वा बढी प्रयोग गरौँ । तर यसमा कम वा बढी प्रयोग गर्ने भन्दा पनि आफ्नो छाला अनुसारको कस्मेटिक प्रयोग गरियो भने त्यसको कुप्रभावबाट बच्न सकिन्छ।

दोस्रो कुरा हामी कुनै पनि कस्मेटिक खरीद गर्न जाँदा हामी‘ फलानो कम्पनी क्रिम’ भन्छौँ, किन्छौँ र लगाउँछौँ तर यतिले पुग्दैन । एउटै कम्पनीको धेरै थरीका क्रिम हुन्छन् । हामीले आफ्नो छालाको प्रकार अनुसार मिल्ने कस्मेटिक लिनुपर्छ । त्यो गरेमा कमसेकम त्यसको दुष्प्रभावबाट धेरै हद सम्म बच्न सक्छौँ।

आवश्यकताभन्दा बढी कस्मेटिक प्रयोग गरयो भने छालामा कुप्रभाव पर्छ । त्यसले एक्जिमा वा एलर्जी सबैभन्दा बढी देखिने कुप्रभाव हुन्।

एलर्जी पनि दुई किसिमको हुन्छ । एउटा भागमा कस्मेटिक प्रयोग गर्दा शरीरभरी एलर्जी हुन्छ भने अर्को जुन भागमा लगाएको हो त्यो भागमा एलर्जी हुन्छ।

कहिलेकाहिँ शरीरका एक भागमा कस्मेटिक लगाउँदा इमर्जेन्सी हुन्छ जसले पूरै शरीर सुन्निन पनि सक्छ । त्यो कस्मेटिकको दोष होइन । के हुन्छ भने एउटै खाले कस्मेटिक हजाराँै व्यक्तिले प्रयोग गरिरहेका हुन्छन् तर कुनै एक व्यक्तिको छालाले त्यो कस्मेटिकमा भएको केमिकललाई पचाउन नसकेको कारण त्यस्तो हुन्छ।

यस्तो खालको समस्या हुँदा चिकित्सकलाई देखाउन जरुरी हुन्छ। साथै कुन क्रिम लगाउँदा समस्या भएको हो, त्यो कस्मेटिक पनि सँगै लिएर आइयो भने चिकित्सकलाई बुझ्न र समस्या समाधान गर्न सहज हुन्छ।

कुनै पनि कस्मेटिकले एलर्जी भयो भने त्यो कस्मेटिकको नामले एलर्जी भएको होइन । त्यसमा प्रयोग गरिएका थुप्रै केमिकलमध्ये एक केमिकलले असर गरेको हुन्छ । त्यसैले चिकित्सकलाई  देखाउन आउँदा आफूले प्रयोग गरिरहेको क्रिम लिएर आउनुपर्छ।

मुख्य गरी मानिसहरुको सामान्य छाला, चिल्लो छाला, सुक्खा छाला र मिश्रित छाला हुन्छ । त्यसैले सोही अनुसारको कस्मेटिक प्रयोग गर्नुपर्छ । त्यसका लागि छाला वा सौन्दर्य विशेषज्ञसँग रायसल्लाह लिन सकिन्छ।

कस्मेटिक एलर्जीको समस्या लिएर हामीकहाँ हरेक दिन एक, दुईजना मानिस आउनुहुन्छ।

हामीकहाँ कस्मेटिकको गुणस्तरमापन गर्ने छुट्टै निकाय छैन । औषधि व्यवस्था विभागमा यसको गुणस्तर मापन गर्न छुट्टै शाखा भए धेरै राम्रो हुन्थ्यो । जसले कमसल खालका कस्मेटिक भित्रन वा उत्पादनमा निगरानी राख्न सकोस्।  - डा अनिलकुमार झा, छालारोग विशेषज्ञ , स्वास्थ्य खबर पत्रिकाबाट