भदौमा अञ्जुको एकल प्रस्तुति

काठमाडौँ ।  नेपाली सुगम सङ्गीतको क्षेत्रमा विशिष्ट गायकी प्रस्तुत गर्दै आउनुभएकी गायिका अञ्जु पन्तको पहिलोपटक एकल साङ्गीतिक प्रस्तुति आयोजना गरिनेभएको छ ।  
दुई दशकको गायन यात्रामा गायिका पन्तले सयौँ कर्णप्रिय आवाज नेपाली सङ्गीतमा दिइसक्नुभएको छ ।  एकल प्रस्तुतिमा गायिका अञ्जुले आफ्ना लोकप्रिय गीत लाइभ म्युजिकका साथमा प्रस्तुत गर्नुहुनेछ ।  
अञ्जु पन्त सुमधुर सन्ध्या २०७४ बारे जानकारी दिन शनिबार राजधानीमा आयोजित पत्रकार सम्मेलनमा गायिका अञ्जु पन्तले दुई दशकको गायन अवधिमा एकल गायनका लागि धेरै प्रस्ताव आए, गरिन ।  अहिले बालबालिकाको शिक्षामा सहयोग गर्ने उद्देश्यसहित पहिलोपटक एकल सन्ध्या गर्दैछु ।  सबैको सहयोगको अपेक्षा गरेकी छु भन्नुभयो । 
अञ्जु पन्त फाउन्डेसन र म्युजिक रेकर्डिस्ट एसोसिएसन नेपालद्वारा संयुक्त रूपमा आयोजित पत्रकार सम्मेलनमा दिइएको जानकारी अनुसार भदौ २४ गते हुने सुमधुर सन्ध्याबाट सङ्कलित रकममा कार्यक्रम खर्च कटाई फाउन्डेसन र एसोसिएसनलाई बराबर रकम बाँडफाँड गरिनेछ ।  एसोसिएसनले पनि सो रकमबाट सङ्गीतकर्मी सहयोगका लागि कोष खडा गर्ने लक्ष्य राखेको छ ।  
सानैदेखि पकेट खर्च जोहो गरेर, गीत गाएर, कसैले दिएको उपहार जम्मा पारेर दुःखीलाई दान गर्ने मेरो बानी थियो –समाजसेवाको बाल्यकालीन स्वभावलाई गायनमार्फत टेवा दिने उद्देश्यबारे चर्चा गर्दै गायिका पन्तले समाजसेवा गर्न कसैको मुख ताक्नुपर्दैन । हामी आफैँ केही गर्न सक्छौँ भन्ने हाम्रो सपनामा सबैको साथ रहनेछ भन्नुभयो ।