काठमाडौं, असार ३० गते । प्रस्तावित प्रधानन्यायाधीश गोपाल पराजुलीविरुद्ध संसदीय सुनुवाइ विशेष समितिले उजुरी आह्वान गरेको १० दिनको समय सीमामा एउटा पनि उजुरी दर्ता भएन । समिति सचिवालयका अनुसार उजुरी दिने अन्तिम दिन बुधबारसम्म कुनै पनि माध्यमबाट पराजुलीविरुद्ध उजुरी नपरेको हो ।
समितिले प्रस्तावित पदाधिकारीको संसदीय सुनुवाइअघि सर्वसाधारणसँग समेत उजुरी माग्ने कार्यविधिअनुसार १० दिनको समय दिएर यही असार १९ देखि उजुरी माग गरेको थियो । एउटा पनि उजुरी नपरेपछि समितिले सुुनुवाइ प्रक्रिया अघि बढाउनेबारे प्रारम्भिक छलफलको बैठक शुक्रबार बिहान बोलाएको छ । समिति सचिव ध्रुवप्रसाद घिमिरेले शुक्रबार बिहान सुनुवाइ प्रक्रिया अघि बढाउनेबारे बैठक बोलाइएको बताउनुभयो । घिमिरेले भन्नुभयो, ‘उजुरी एउटा पनि परेको छैन, अबको सुनुवाइ प्रक्रियाबारे छलफल गर्न शुक्रबार बिहान ८ः३० बजे बैठक बोलाइएको छ । ’
शुक्रबारको बैठकले सुनुवाइको मिति तोक्नेछ । प्रस्तावित प्रधानन्यायाधीशको आइतबार सुनुवाइ गर्ने तयारी समिति सचिवालयले गरेको छ । समितिमा सुनुवाइपछि प्रस्तावित पदाधिकारीको नाम अनुमोदन हुने वा नहुनेबारे समितिले निर्णय लिनेछ ।
समितिले असार १९ देखि उजुरी माग गर्दै सुनुवाइ प्रक्रिया अघि बढाएको थियो । समितिले १० दिनसम्म उजुरी दिन सक्ने व्यवस्था गरे पनि एउटा पनि उजुरी दर्ता नभएको हो । समितिले तोकिएको समय सीमामा सर्वसाधारण र सरोकारवालाले उजुरी दिन सक्ने व्यवस्था गरेको थियो ।
असार १५ गते संवैधानिक परिषद्ले भावी प्रधानन्यायाधीशमा पराजुलीलाई सिफारिस गरेको थियो । प्रमुख विपक्षी दलको असहमतिका कारण केही दिन रोकिएको सिफारिस दोस्रो चरणको स्थानीय तह निर्वाचन सकिएलगत्तै भएको थियो ।
संसद्को कार्य सञ्चालन नियमावली तथा सुनुवाइ कार्यविधिअनुसार उजुरी नपरेपछि अब पदाधिकारीको सुनुवाइको प्रक्रियामात्र बाँकी छ । समितिले सम्बन्धित पदाधिकारीको सुनुवाइपछि अनुमोदन वा अस्वीकृत दुवै गर्न सक्नेछ । तर, अस्वीकृत गर्न समितिको कम्तीमा दुई तिहाइ बहुमत आवश्यक पर्नेछ । अनुमोदन भने बहुमतले गर्न सक्नेछ ।
समितिले सुनुवाइ प्रक्रिया सुरु भएको ४५ दिनभित्र प्रस्तावित पदाधिकारीको नाम स्वीकृत वा अस्वीकृत निर्णय लिइसक्नुपर्नेछ । ४५ दिनभित्र समिति अनिर्णित भएमा प्रस्तावित पदाधिकारीको नियुक्तिका लागि बाधा पर्ने छैन । संवैधानिक प्रावधानअनुसार सुनुवाइ प्रक्रिया पूरा गरेपछि प्रधानन्यायाधीशलाई राष्ट्रपतिले नियुक्ति गर्नुहुनेछ ।
Post a Comment