वीरगन्जमा राजपाको बन्द अवज्ञा

शुक्रबार खुलेका वीरगन्जका पसलहरु ।
वीरगन्ज,  असार २ गते । मंगलवारदेखि आह्वान गरिएको चार दिने हडताल फिर्ता नभएको राष्ट्रिय जनता पार्टीले बताए पनि वीरगन्जमा शुक्रबार भने पसल तथा बजारहरु खु्लेका छन् । मंगलवारदेखि तीन दिनसम्म पसल बन्द गरेका वीरगन्जका व्यपारीहरुले शुक्रबार भने बन्दको अवज्ञा गर्दै पसल खोलेका हुन् ।
यस्तै वीरगन्जमा शुक्रबार सार्वजनिक यातायातका सवारी साधनहरु पनि निर्वाध रुपमा सञ्चालनमा आएका छन् । बजार खुलेको र सार्वजनिक यातायातका सवारी साधनहरु सन्चालनमा आएपछि वीरगन्जमा मान्छेहरुको चहल पहल पनि बढेको छ ।
'तीन दिन त पसल बन्द गरेकै हो, अब कति दिन गर्ने ?', वीरगन्ज आदर्शनगरका एक पसलेले भने, 'अब धेरै दिन पसल गर्न सक्दैनौ किन कि बन्द हडतालले कसैलाइ पनि फाइदा छैन, मधेसी दलहरु आफै आफैमा लड्न थालेका छन्, अनि आन्दोलनको नाममा बन्द हडताल गरेर हामी व्यपारीलाइ मात्रै दुख दिइरहेका छन् ।'
बन्दको चौथो तथा अन्तिम दिन शुक्रबार बिहान पानी परेका कारण वीरगन्जका सडकमा आन्दोलनकारी देखा परेनन् । तर पानी पर्न रोकिएपछि घण्टाघर, नगवा, मालपोत चोक, पावरहाउस लगायतका केही स्थानमा राजपाका कार्यकर्ताले टायर बाले । त्यसपछि सडकमा आन्दोलनकारीहरु नदेखिएपछि वीरगन्जका व्यपारीहरुले मध्यान्हदेखि पसल खोलेका हुन् ।
राजपाका महासचिव शिव पटेलले बन्द फिर्ता नभएको बताउँदै पानी परेकोले कार्यकर्ता सडकमा नदेखिनु स्वभाविक भएको बताउनु भयो । आन्दोलनकै क्रममा शुक्रबार दिउँसो वीरगन्जमा लाठी जुलुस प्रदर्शन गर्ने कार्यक्रम रहेको पनि पटेलले जानकारी दिनु भयो ।
राजपालाई मनाउनकै लागि भनेर सरकारले प्रदेश नम्बर २ को निर्वाचन असोज २ गते सारे पनि राजपाले त्यसमा आफूहरुको सहमति नभएको भन्दै आन्दोलन जारी नै रहेको बताएको छ ।- अन्नपूर्ण बाट ,  तस्बिर : क्रान्ति शाह