काठमाडौं , जेठ २२ गते । भरतपुर महानगरपालिकाको वडा नम्बर १९ को फैसला आज दुई बजेपछि आउने भएको छ । मतगणना सुचारु गर्नुपर्ने मागसहित आइतबार सर्वोच्च आदालतमा परेको रिट निवेदनको सुनुवाई आज दुई बजेपछि हुने भएको हो ।
उक्त मुद्वाको बेञ्च न्यायाधिश चोलेन्द्र शमशेर जवराको इजलासमा परेको छ । चोलेन्द्रको एकल इजलासले सभंवत आजै उक्त मुद्वाको किनारा लगाउने छ । निर्वाचन आयोगले भरतपुर महानगरपालिकाको वडा नम्बर १९ मा पुनः मतदान गर्नुपर्ने निर्णय गरेपछि असन्तुष्ट पक्षले सर्वोच्चमा रिट दायर गरेको थियो ।
सोही गाउँका मतदाता समेत रहनुभएका अधिवक्ता तुलसीराम पाण्डे र नेकपा एमालेको भरतपुर १९ को खुलातर्फबाट वडा सदस्यका उम्मेदवार बन्नुभएका गुञ्जमान विश्वकर्माले भरतपुरमा पुनः मतदान गराउन नहुने भन्दै रिट दायर गर्नुभएको थियो । उक्त रिटको पेशी सोमबारका लागि तोकिएको थियो ।
प्रमुख प्रतिपक्ष दल नेकपा एमालेले भरतपुर १९ मा च्यातिएका मतपत्र बदर गरी मतगणना सुचारु गर्न ध्यानाकर्षण गराउँदै संसद अबरुद्ध गरिरहेको छ । मतगणना चलिरहेको बेला माओवादी प्रतिनिधिले मतपत्र च्यातेका थिए ।
मतपत्र च्यात्ने माओवादी कार्यकर्ता भने धरौटीमा छुटिसकेका छन् । केही दिनअघि निर्वाचन आयोगले भरतपुर १९ मा पुनः निर्वाचन गराउने निर्णय गरेपछि एमालेले उक्त निर्णयको विरोध गर्दै आएको छ।
भरतपुर महानगरपालिकामा रेणु दाहाल र देवी ज्ञवालीबीच रोचक प्रतिष्पर्धा छ । प्रचण्डपुत्री रेणु नेकपा माओवादी केन्द्र र कांग्रेसको साझा उम्मेदवार हुनुहुन्छ भने ज्ञवाली एमालेका तर्फबाट उम्मेदवार हुनुहुन्छ । - अन्नपूर्ण बाट
Post a Comment