नेपाली महिला क्रिकेट कप्तान रुबिना मेलवर्नमा सम्मानित

क्रिकेट अष्ट्रेलियाले तोक्यो कम्युनिटी एम्बेस्डर

हाल अष्ट्रेलियामा रहेकी नेपाली महिला राष्ट्रिय क्रिकेट टिमकी कप्तान रुबिना क्षेत्रीलाई नेपाली एशोसियसन अफ भिक्टोरियाले एक समारोह आयोजना गरी सम्मान गरेको छ ।

क्रिकेट अष्ट्रेलिया र मेलवर्न रेनिगेड्सका प्रतिनिधिसमेत उपस्थित उक्त सम्मान कार्यक्रममा भिक्टोरियास्थित नेपाली महावाणिज्यदूत चन्द्र योञ्जन, नेप्लीज एशोसियसन अफ भिक्टोरियाका क्रिकेट प्रशिक्षक हुसेन हनिफ, हिमालयन क्रिकेट क्लबका अध्यक्ष बोम योञ्जन सहभागी थिए ।

सम्मान कार्यक्रममा बोल्दै नेपाली एशोसिसयन अफ भिक्टोरियाका अध्यक्ष डा. अनुपम पोख्रेलले उक्त संस्थाले क्रिकेट खेलमा गरेको योगदानबारे ब्याख्या गरेका थिए ।

उनले छिट्टै महिला क्रिकेट टिम स्थापना गर्ने पनि बताए । आगामी जनवरी २२ देखि क्रिकेट टुर्नामेन्ट र मल्टिकल्चरल क्रिकेट टुर्नामेन्ट आयोजना गर्ने जानकारी पनि उनले दिए ।

सम्मान कार्यक्रममा नेपाली महिला क्रिकेट टिमकी कप्तान रुबिना क्षेत्रीले आफू झापाबाट संघर्ष गर्दै नेपालको महिला राष्ट्रिय क्रिकेट टिमको कप्तान कसरी भएँ भन्ने कुरा सुनाइन् । रेनिगेड्सको तालिम क्षमता अभिवृद्धि गर्न आफूलाई निकै उपयोगी हुने पनि उनले बताइन् ।
क्रिकेट अष्ट्रेलियाले हालै नेपाली एशोसियसन अफ भिक्टोरियाका उपाध्यक्ष तारा गैरे र नेपाली समुदायका प्रतिभावान क्रिकेट खेलाडी सुनाम गौतमलाई कम्युनिटी एम्बेस्डर घोषणा गरेको छ ।

सम्मान कार्यक्रम लगत्तै रुबीना क्षेत्रीले कार्यक्रममा उपस्थित महिला समूहसँग क्रिकेट खेलेकी थिइन् ।अनलाइनखबर