न्युयोर्क – न्युयोर्क र न्युजर्सीमा बम विस्फोट गराएको आरोपमा एक व्यक्ति पक्राउ परेका छन् ।
‘मस्ट वान्डेड’ सूचीमा राखिएको २८ वर्षीय अहमद खान रहामीलाई प्रहरीले सोमबार बिहान पक्राउ गरेको हो । रहामी पक्राउ पर्नु केही घण्टाअघि मात्र प्रहरीले सबैको मोबाइलमा उनी ‘वान्टेड’ रहेको खबर फैलाएको थियो ।
प्रहरीको खबरपछि सोमबार बिहान १०ः३० बजे एक व्यक्तिले रहामी न्युजर्सीको एक घरमा रहेको खबर गरेको थियो ।
पक्राउ गर्दा उनलाई गोली लागेको प्रहरीले जनाएको छ । उनलाई पक्राउ गर्न पुगेका चार जना प्रहरीमाथि गोली प्रहर गरेपछि उनीमाथि जवाफी कारवाही गर्दा गोली लागेको बताइएको छ । घटनामा दुई जना प्रहरी पनि घाइते भएको प्रहरीले जनाकारी दिएको छ ।
‘उसले हिँड्दै जथाभावी गोली प्रहार गर्दै थियो,’ कारवाहीमा संलग्न एक प्रहरीले भने ।
न्युयोर्कका मेयरले घटना ‘आतंकवाद’ सँग सम्बन्धित रहेको पुष्टि भएको बताएका छन् । तर, घटनामा रहामी बाहेक अन्य व्यक्तिहरुको खोजी नभएको न्युयोर्क प्रहरीले बताएको छ ।
चेल्सी क्षेत्रमा विस्फोट नभएको बममा रहामीको औँलाको प्रिन्ट भेटिएको थियो । त्यसैको आधारमा उनको खोजी गरिएको थियो ।
रहामीले दुई स्थानमा बम विस्फोट गराएपनि अन्य आठ स्थानमा बम विस्फोट गर्न असफल भएका थिए । घटनामा दुई दर्जनभन्दा बढी घाइते भएका थिए ।
Post a Comment