स्पेनिस प्रिमियर लिग ला लिगामा लगातार दोस्रो जित हासिल गर्ने क्रममा एथ्लेटिको मड्रिडले स्पोर्टिङ गिजोनमाथि ५-० को शानदार जित हासिल गरेको छ ।
लिगको सुरुवाती दुई खेलमा बराबरीको नतिजा निकालेपछि आलोचित बनेको एथ्लेटिकोले ठूलो अन्तरमा जित हासिल गर्दै लयमा फर्केको संकेत गरेको छ ।
घरेलु मैदानमा स्टाडियो भिन्सेन्टेमा एथ्लेटिकोका एन्टोइन ग्रिजम्यानले खेल सुरु भएको दोस्रो मिनेटमै टोलीलाई अग्रता दिलाएका थिए । पाचौं मिनेटमा गामिरियोले एथ्लेटिकोको अग्रता दोब्बर बनाए ।
३१औं मिनेटमा ग्रिजम्यानले व्यक्तिगत दोस्रो गोल गर्दा पहिलो हाफमा एथ्लेटिकोले ३-० को अग्रता लियो ।
दोस्रो हाफमा उसले थप दुई गोल गर्न सफल भयो । दुवै गोल भेट्रान स्ट्राइकर फर्नाण्डो टोरेसले गरेका थिए । उनले ७२औं र खेलको इन्ज्यूरी समयमा गोल गरेका थिए ।
जितसँगै लिगको चार खेलबाट आठ अंक जोडेको एथ्लेटिको चौथो स्थानमा उक्लिएको छ । गएरातिनै सम्पन्न खेलमा मालागालाई १-० ले हराएको ला पाल्मास लिगको शीर्ष स्थानमा उक्लिएको छ ।
Post a Comment