![profit-photo](http://www.onlinekhabar.com/wp-content/uploads/2014/11/profit-photo.jpg)
काठमाडौं,साउन २३ गते । आइतबार तीन वाणिज्य बैंकले गत आर्थिक वर्षको अपस्किृत वित्तीय विवरण सार्वजानिक गरेका छन् । तीनवटै बैंकको नाफा बढेको प्रकाशित वित्तीय विवरणमा उल्लेख छ ।
गत आर्थिक वर्षमा नेपाल इन्भेष्टथमेन्ट बैंकले २ अर्ब ५५ करोड रुपैयाँ नाफा कमाएको छ । यो नाफा अघिल्लो वर्षकोभन्दा ३० प्रतिशतले बढी हो । बैंकको खुद व्याज आम्दानीमा ३१.६६ प्रतिशतले बढेर ३ अर्ब ९२ करोड रुपैयाँ पुगेपछि त्यसले नाफा वृद्धिमा महत्वपूर्ण सहयोग गरेको हो ।
चुक्ता पुँजी ७ अर्ब २५ करोड रुपैयाँ भएको बैंकको जगेडा कोषमा १० अर्ब ५५ करोड रुपैयाँ छ । एक वर्षको अवधिमा बैंकको निक्षेप संकलन १९.८५ प्रतिशत बढेर १ खर्ब ८ अर्ब ६२ करोड रुपैयाँ पुगेको छ । त्यसैगरी, एक वर्षको अवधिमा बैंकको कर्जा प्रवाह १६.१९ प्रतिशतले बढेर ८७ अर्ब ९७ लाख रुपैयाँ पुगेको छ ।
बैंकको प्रतिसेयर वाषिर्क आम्दानी ३५.१६ रुपैयाँ, मुल्य आम्दानी अनुपात २९.५८ गुणा, प्रतिसेयर नेटवर्थ २ सय ४५.४९ रुपैयाँ रहेको वित्तीय विवरणमा उल्लेख छ । बैंकको खराब कर्जा ६८ प्रतिशत छ ।
त्यसैगरी, गत आर्थिक वर्षमा कुमारी बैंकले ७४ करोड रुपैयाँ नाफा कमाएको छ । यो अघिल्लो आवको भन्दा ८७.५० प्रतिशतले धेरै हो । अघिल्लो आव बैंकले ३० करोड ५० लाख रुपैयाँ नाफा कमाएको थियो ।
संभावित जोखिम व्यवस्थाका लागि छुट्याएको मोटो रकम फिर्ता भएपछि त्यसले बैंकको नाफा बढाएको हो । यस अवधिमा बैंकले ४३ करोड २० लाख रुपैयाँ जोखिम व्यवस्थाका लागि छुट्याइएको रकम फिर्ता (राइटब्याक) गरेको छ ।
२ अर्ब ६९ करोड चुक्ता पुँजी रहेको बैंकको जगेडा कोषमा एक अर्ब ३८ लाख रुपैंयाँ रहेको छ । बैंकले सो अवधीमा खराब कर्जालाई २ दशमलब ४९ प्रतिशतबाट घटाएर एक दशमलब ११ प्रतिशतमा सिमित गराएको छ ।
बैंकले ३७ अर्ब ९५ करोड निक्षेप संकलन गरेर ३० अर्ब ११ करोड रुपैंयाँ कर्जा तथा सापटी प्रवाह गरेको छ । बैंकको प्रतिसेयर आम्दानी २७ रुपैंयाँ ४२ पैसा रहेको छ भने प्रति सेयर नेटवर्थ १५१ रुपैंयाँ ४३ पैसा रहेको छ ।
त्यसैगरी, गत आर्थिक वर्षमा जनता बैंकले ३२ करोड ५३ लाख रुपैयाँ नाफा कमाएको छ । जुन अघिल्लो वर्षको भन्दा ११६ प्रतिशतले बढी हो।बैंकको खुद व्याज आम्दानी २३.६७ प्रतिशतले बढेर ७४ करोड ७६ लाख रुपैयाँ पुगेको छ । २ अर्ब ६ करोड रुपैयाँ चुक्ता पूँजी भएको बैंकको जगेडा कोषमा ६२ करोड २९ लाख रुपैयाँ छ ।
त्यसैगरी, बैंकको कुल निक्षेप २४ अर्ब ६ करोड ७५ लाख र कर्जा २० अर्ब ४७ करोड २५ लाख रुपैयाँ पुगेको छ । यस अवधिमा बैंकको प्रतिसेयर वाषिर्क आम्दानी १५.७९ रुपैयाँ, मुल्य आम्दानी अनुपात २८ गुणा, प्रतिसेयर नेटवर्थ १३०.२४ रुपैयाँ छ । बैंकको खराब कर्जा १.१५ प्रतिशत छ ।-अनलाइनखबरबाट
Post a Comment