काठमाडौं,साउन २१ गते । ब्रालिजको रियो दि जेनेरियो शहरमा आयोजित ३१औं ग्रिष्मकालिन ओलम्पिकको पुरुष फुटबलतर्फ घरेलु टोलीले १० खेलाडीमा समेटिएको दक्षिण अफ्रिकासँग गोलरहित बराबरी खेल्दै अंक बाँडेको छ ।
पुरुष फुटबलको समूह ए मा रहेको ब्राजिलले दक्षिण अफ्रिकालाई घरेलु मैदानमा हराउन सकेन । सुपरस्टार नेइमार प्रेरित ब्राजिलले खेल नियन्त्रणमा लिए पनि गोल भने गर्न सकेन । खेलको ५९औं मिनेटमा मोथोवी मभालाले दोहोरो पहेँलो कार्ड पाएपछि १० खेलाडीमा समेटिएको दक्षिण अफ्रिकाले ब्राजिलको राष्ट्रिय रंगशालामा बहादुरी प्रदर्शन गर्दै बराबरीमा रोक्न सफल भयो ।
यसै समूहको अर्को खेलमा पनि डेनमार्क र इराकले गोलरहित बराबरी खेल्दै अंक बाँडे । यस समूहमा सबै टोलीको समान १/१ अंक भएको छ ।
यता युरोपियन च्याम्पियन पोर्चुगलको युवा टोलीले समूह डी मा उपाधिको दावेदारमध्ये एक मानिएको अर्जेन्टिनालाई दुई शून्यले हराउँदै ओलम्पिकमा विजयी सुरुवात गर्यो ।
पोर्चुगलका लागि गोन्कालो प्यासेन्सियाले ६६औं मिनेटमा अग्रता दिलाएका थिए । ८४औं मिनेटमा पिटेले अग्रता दोब्बर बनाउँदै पोर्चुगललाई दुई शून्यको जित सुनिश्चित गराए ।
यसै समूहको अर्को खेलमा होण्डुरसले अल्जेरियालाई ३-२ को जित हासिल गर्न सफल भयो ।
यता समूह सी अन्तर्गतको खेलमा विश्वबिजेता जर्मनीको युवा टोलीले मेक्सिकोसँग दुई दुईको बराबरी खेल्यो । मेक्सिकोले दुई पटक खेलमा अग्रता लिएपछि जर्मनीले गोल फर्काउन सफल भएको थियो ।
यस समूहको अर्को खेलमा एशियाली महारथी दक्षिण कोरियाले फिजीबिरुद्ध शानदार जित हासिल गर्यो । कोरियाले फिजिको पोष्टमा ८ गोल गर्न सफल भयो । अझ एक पेनाल्टीको अवसर कोरियाली खेलाडीले सदुपयोग गर्न सकेनन् ।
यता समूह बी मा रहेको नाइजेरियाले अर्को एशियाली महारथी जापानबिरुद्ध ५-४ गोलको रोमाञ्चक जित हासिल गर्न सफल भयो । सुरुवातदेखि नै जापानबिरुद्ध आक्रामक देखिएको नाइजेरियाले पहिलो हाफमै ३-२ को अग्रता लिएको थियो । दोस्रो हाफको सुरुवातमै दुई गोल गरेको नाइजेरियाबिरुद्ध जापानले खेलको अन्त्यतिर दुई गोल फर्काएपनि खेल आफ्नो पक्षमा पार्न सकेन । नाइजेरियाका लागि पाँचमध्ये चार गोल २० बर्षीय मिडफिल्डर पिटर एटेवोले गरेका थिए ।
यो समूहको अर्को खेलमा स्वीडेन र कोलम्बियाले २/२ को बराबरी खेल्दै अंक बाँडे ।-अनलाइनखबरबाट
Post a Comment