हरान – सन् २०१० मा पक्राउ परेका इरानका परमाणु वैज्ञानिक शाहराम अमिरीलाई मृत्युदण्ड दिइएको परिवारले बताएका छन् ।
अमिरीका आमाका अनुसार उनको शवलाई गृहनगर पुर्याएको र घाँटीमा डोरीको निशान रहेको थियो । उनलाई झुण्डाएर मृत्युदण्ड दिइएको उनले बताइन् । उनको त्यही अन्तिम संस्कार गरिएको उनले जानकारी दिइन् ।
सिआइएले जबर्जस्ती लगेको भन्दै अमेरिका पुगेका अमिरी त्यहाँबाट फर्केपछि पक्राउ परेका थिए । त्यसपछि उनलाई गोप्य ठाउँमा राखिएको थियो । केही रिपोर्टका अनुसार उनलाई इरानको परमाणु कार्यक्रमसम्बन्धि विस्तृतमा ज्ञान रहेको बताइएको छ ।
सन् १९७७ मा जन्मेका अमिरी सन् २००९ मा मक्कामा गएका बेला गायब बनेका थिए । त्यसको एक वर्षपछि उनी अमेरिकामा सार्वजनिक हुँदै आफूलाई सिआइएले अपहरण गरेको र आफूलाई इरानको गोप्य तथ्य सार्वजनिक गर्न दबाब दिएको जानकारी दिएका थिए ।
उनले सार्वजनिक गरेको भिडियोमा उनले अमेरिकी सिआइएले उनलाई गोप्य स्थानमा लगेको र इन्जेक्सन दिएर गोप्य कुरा खोल्न दबाब दिएको बताएका थिए ।
त्यसपछि अर्को भिडियोमा उनले आफू अमेरिकाको कस्टडीबाट भाग्न सफल भएको बताएका थिए । सन् २०१० मा इरान फर्किएका उनको हिरोको जस्तै गरी स्वागत गरिएको थियो ।
त्यतिबेला अमेरिकी अधिकारीहरुले भने अमिरी आफै भागेर आएको र इरानको बारेमा ‘महत्वपूर्ण’ जानकारी दिएको दाबी गरेका थिए ।
इरान फर्किएपछि अमिरीमाथि देशद्रोहको लामो मुद्दा चलाइएको थियो ।- रातोपाटीबाट
Post a Comment