कडा आन्दोलन गर्ने नर्सको तयारी, गठन भयो २१ सदस्यीय संघर्ष समिति(२० बुँदे मागसहित)
काठमाडौं– नेपाल नर्सिङ संघले राख्दै आएको २० सूत्रीय माग पूरा गराउन एक संघर्ष समिति गठन गरेको छ । बुधवार उपत्यकामा कार्यरत नर्सहरुको एक भेला २१ सदस्य संघर्स समिति गठन गरेको हो ।
आफ्ना माग स्वास्थ्य मन्त्रालयलगायत सरोकारवाला निकाय समक्ष प्रस्तुत गरेको लामो समय भइसक्दा पनि पूरा नभएकाले कडा आन्दोलनका लागि समिति गठन गरेको नर्सिङ संघकी उपाध्यक्ष गंगा थापाले बताइन् । उनले भनिन्, ‘हाम्रा मागहरु पूरा हुने प्रक्रियामा होलान् भन्ने आशा बाँकी छ तर अब पनि पूरा गरिएन भने सहेर बस्न सकिदैन ।’
भेलाले साउन महिना भरि स्वास्थ्य मन्त्रालय र सरोकारवाला निकायसँग वार्ता र छलफल गर्ने निष्कर्ष निकालेको छ । यही अवधिमा सम्पूर्ण जिल्लामा आफूले गर्नुपर्ने हदैसम्मको आन्दोलनका लागि नर्सहरुलाई तयार पार्ने संघकी अध्यक्ष तारा पोखरेलले बताइन् । उनले भनिन्, ‘साउन अन्तिमसम्म माग पूरा नभए आन्दोलन सुरु हुनेछ ।’
नर्सिङ संघका माग पूरा गर्न स्वास्थ्य मन्त्रालयका प्रमुख विशेषज्ञ डा सेनेन्द्रराज उप्रेतिको नेतृत्वमा मन्त्रालयले एक समिति गठन गरेको छ तर समतिले काम भने गरेको छैन ।
मागहरुः
१. अधिकार सहितको नर्सिङ सेवा महाशाखा पुर्नस्थापना गर्ने ।
२. जनतालाई गुणस्तरीय नर्सिङ सेवा दिनको लागि नेपाल सरकारले बनाएको नर्स बिरामीको अनुपात सवै अस्पतालहरुमा यथाशिघ्र लागु गर्नुपर्ने ।
३.विभिन्न निजी स्वास्थ्य संस्थाहरुमा कार्यरत नर्सहरुलाई नेपाल सरकारले उपलब्ध गराइरहेको न्युनतम तलव भत्ता तहगत हिसाववाट दिनु पर्ने ।
४. भोलेन्टिएर को नाममा भइरहेको श्रम शोषण बन्द गरिनु पर्ने ।
५. योग्यता पुगेका अ.न.मि लाई स्टाफ नर्स, स्टाफ नर्सहरुलाई माष्टर नर्सिङ र माष्टर नर्सिङ लाई पि.एच.डि सम्मको तलवी अध्ययन विदा दिइनु पर्ने ।
६. माथेमा आयोगले दिएको प्रतिवेदन अनुसार एमडी\एमएसमा जस्तैः (एमएन\एमएसजी नर्सिङ पढ्ने नर्सहरुलाई नि:शुल्क अध्ययनको मौका दिइनु पर्ने ।
७. लोक सेवा आयोगले लिने परिक्षामा जुन तहको परिक्षा हो त्यसलाई ध्यान राखेर प्रश्न पत्र निर्माण गरिनु पर्ने र त्यही तहकोलाई प्राथमिकता दिइनु पर्ने ।
८. मन्त्रालय अन्तर्गत महाशाखा प्रमुखहरु र स्वास्थ्य सेवा विभागका प्रमुखहरुमा कम्तिमा ३३∞ सिट नर्सहरुको लागि सुरक्षित गरिनु पर्ने ।
९. टिकापुर अस्पताल कैलालीमा कार्यरत ४ जना अ.न.मि.हरुलाई ८ वर्ष सम्म न्युन पारिश्रमिकमा काम लगाई नेपाल सरकारले दिने तलव भत्ता माग गर्दा निस्कासन गरिएकोमा नर्सिङ संघ आपत्ति प्रकट गर्दछ साथै उनीहरुलाई नेपाल सरकारको अ.न.मि.को तलव भत्ता ( निष्कासन गरेको समयको समेत) उपलब्ध गराई ससम्मान पुनर्वहाली गरिनु पर्ने ।
१०. हेल्थ रिसर्च काउन्सिलमा नर्सहरुको सिट सुरक्षित हुनु पर्ने ।
११. जनतालाई स्तरीय नर्सिङ सेवा दिन स्कुल,कलेज,उद्योगधन्दा आदिमा नर्सिङ दरवन्दी को लागि पहल गरिनु पर्ने ।
१२. दुर्गममा काम गर्ने नर्सहरुलाई उचित पारिश्रमिक र सुरक्षाको व्यवस्था गरिनु पर्ने
१३. तालिम गोष्ठी आदिमा दुर्गममा कार्यरत नर्सहरुलाई प्राथमिकतामा राखिनु पर्ने ।
१४. क्षेत्रिय स्वास्थ्य निर्देशनालयमा पनि उच्च शिक्षा र अनुभव भएका नर्सहरुलाई निर्देशक बनाइनु पर्ने ।
१५. Inservice education (सेवामा रहदा पढ्न पाउन)लाई रेगुलर रुपमा लागु गर्नु पर्ने ।
१६. नेपाल सरकारले दिइरहेको गरेको आइओएमको उच्च अध्ययन कोटा( नर्सिङ को) बढाउ“दै लानुपर्ने ।
१७. राजदुत लगायत संवैधानिक अंगहरुमा नर्सहरुको प्रतिनिधित्व हुनु पर्ने ।
१८.विभिन्न प्रलोभन देखाई चाइना, बेंङलोर र मैङलौरका कमसल कलेजहरुमा नर्सिङ लगायत अन्य स्वास्थ्य शिक्षा पढ्न पठाउने शैक्षिक माफियाहरुलाई तुरुन्त कारवाही गरिनु पर्ने ।
१९. प्राइमरी हेल्थ केयर सेन्टर लगायत हेल्थ पोष्टहरुमा वरिष्ठताका आधारमा नर्सलाई पनि इन्चार्जशिप दिइनु पर्ने ।
२०. हाम्रा नर्सहरु प्राध्यापक, सचिव र विशिष्ट श्रेणीमा पुगेर अवकाश पाएका पनि छन् अरु प्रोफेशनका जनशक्ति अवकाश पश्चात पनि नेपाल सरकारका विभिन्न आयोग, समिति आदिमा समेटिएका छन् भने नर्सिङ पेशाकर्मिहरुलाई पनि सो अवसर प्रदान गरिनु पर्ने ।
Post a Comment