त्यसो त गौतमजस्तै ओम अस्पतालका निर्देशक डाक्टर भोला रिजाल पनि यो सत्यलाई स्वीकार गर्छन् । कतिपय डाक्टर वा अस्पतालले पैसाकै लागि पनि अनावश्यक रूपमा अपरेसन गरी बच्चा जन्माउने गरेको हुन सक्ने भन्दै त्यसलाई कडाइ गर्नुपर्ने बताउँछन् डाक्टर रिजाल ।
अहिले निजी अस्पतालले कुल संख्याको ९३ प्रतिशतसम्म अपरेसन गरी बच्चा जन्माउनुको अर्को कारण डाक्टर र अस्पतालको असुरक्षा पनि हो । सुत्केरी गराउँदा हुन सक्ने दुर्घटनामा डाक्टर तथा अस्पतालमाथि दोष आउने गरेकाले कुनै पनि डाक्टरले जोखिम लिन नचाहँदा अपरेसनको दर बढिरहेको छ ।
नेपालमा अहिले पनि एक हजार महिलाको सुत्केरी गराउँदा १७ जना सुत्केरीको मृत्यु हुने गरेको तथ्यांक छ । त्योबाहेक शिशु मृत्युदर उस्तै बढी छ । यदि सुत्केरी गराउँदा आमा वा बच्चालाई केही भएमा अस्पताल र डाक्टरलाई दोषी देखाई तोडफोड र प्रदर्शन तथा विरोधमा उत्रने मानसिकताले गर्दा डाक्टरले कुनै जोखिम मोल्न चाहँदैनन् । जसकारण अहिले सिजेरियन सेक्सनको दर बढिरहेको छ ।
कति पैसा लिन्छन् अस्पतालले ?
अहिले निजी अस्पतालले अपरेसन गरी बच्चा जन्माएबापत ५० हजारदेखि तीन लाख रुपैयाँसम्म पैसा लिने गरेका छन् । राजधानीको भ्याली मेटरनिटी अस्पताल, ओम अस्पताल, कान्तिपुर अस्पताल, हिमाल अस्पताल आदिले अपरेसन गरी बच्चा जन्माएबापत ५० हजारदेखि १ लाख ५० हजारसम्म पैसा असुल्ने गरेका छन् । त्यसैगरी बयोधा अस्पताल, ग्रिनसिटी अस्पताल, काठमाडौँ मोडल अस्पताल आदिको अपरेसन र अन्य शुल्क गरी १ लाख ५० हजारदेखि २ लाखसम्म शुल्क लिने गरेका छन् । सुविधासम्पन्न भनिएको नर्भिक अस्पतालले त अपरेसन गरी बच्चा जन्माइदिएपछि विभिन्न शीर्षकमा ३ लाख रुपैयाँसम्म शुल्क लिने गरेको छ ।
यसरी अहिले राजधानीमा आवश्यकताभन्दा पनि गर्भवती वा उनको आफन्तका माग, पैसाको लोभ, जोखिम नलिने मानसिकता आदिका कारण दिनानुदिन अपरेसन गरी बच्चा जन्माउने विधि विकास भइरहेको छ । जसले आमा र बच्चा दुवैलाई असर गरिरहेको छ ।
Post a Comment