रेवती सापकोटा
अस्ट्रेलिया भ्रमणका बारेमा प्रमुख विपक्षी दलका नेता शेरबहादुर देउवालाई बूढानीलकण्ठ पुगेर अवगत गराएलगत्तै दाहाल प्रधानमन्त्री ओलीलाई भेट्न बालुवाटार पुगेका थिए ।
‘राष्ट्रिय सहमतिको सरकार बन्ने बेलामा कता बाहिर जाने कुरा गर्नुभएको हो ? ' ओलीलाई दाहाललाई सोधेको प्रश्न उद्धृत गर्दै बालुवाटार स्रोतले अन्नपूर्णसँग भन्यो । राष्ट्रिय सहमतिको सरकार गठनबारे आफू आफ्नो पार्टीभित्र छलफल गर्न अग्रसर भएको जनाउ प्रधानमन्त्री ओलीले दिएपछि दाहालले अस्ट्रेलिया भ्रमण स्थगित गरेका हुन् ।
स्रोतका अनुसार आफ्नो नेतृत्वको सरकार गिराउने बारेमा अस्ट्रेलियामा शक्तिकेन्द्रका प्रतिनिधिसँग छलफल गर्न लागेको जानकारी पाएका प्रधानमन्त्री ओली दाहालको भ्रमण स्थगित गराउन चाहन्थे ।
‘प्रधानमन्त्री ओलीले राष्ट्रिय सहमतिको सरकार गठनको छलफललाई घनीभूत बनाउने कुरा गरेपछि दाहालले अचानक भ्रमण स्थगित गरेको घोषणा गरेका हुन्', स्रोतले भन्यो ।
दाहालले अस्ट्रेलिया भ्रमण यसअघि दुईपटक स्थगित गरेका थिए । आफ्नो भ्रमणको तयारीका लागि भन्दै माओवादी केन्द्रको अन्तर्राष्ट्रिय विभाग सचिव युवराज चौलागाईंलाई आइतबार नै दाहालले अस्ट्रेलिया पठाएका थिए । जनप्रगतिशील मञ्च अस्ट्रेलियाको तेस्रो अधिवेशन उद्घाटन गर्न दाहाल सिड्नी जाने कार्यक्रम तय भएको थियो ।
‘देशको राजनीतिक सन्दर्भ र पार्टी कामको चापलाई विचार गरी अध्यक्ष प्रचण्डले हालका लागि अस्ट्रेलिया भ्रमण स्थगित गर्नुभएको छ', दाहालको सचिवालयले भनेको छ ।
‘राष्ट्रिय सरकारको नेतृत्व गर्ने बेलामा किन विदेश भ्रमण गर्न थाल्नुभयो ? ' आफ्नो निवास बूढानीलकण्ठ आएका दाहाललाई ठट्यौली भाषामा देउवाले सोधेका थिए । ‘कांग्रेसको मात्रै समर्थनमा सरकारको नेतृत्व गर्दिनँ', दाहालले जबाफ फर्काएका थिए ।
‘कांग्रेसले एमालेलाई समर्थन नगर्ने, एमालेले कांग्रेसलाई समर्थन नगर्ने स्थिति आएपछि कांग्रेस एमालेको समर्थन प्राप्त भएको अवस्थामा अध्यक्षले सरकारको नेतृत्व गर्ने भन्नुभएको हो', दाहालपुत्र प्रकाशले भने ।
देउवाले एमालेबाट समर्थन ल्याएमा राष्ट्रिय सहमतिको सरकारको नेतृत्व गर्न दाहाललाई समर्थन गर्न कांग्रेस तयार रहेको जनाउ दिएका थिए ।
Post a Comment