वासिङटन , असार १ गते । बोलिभियाविरुद्ध उत्कृष्ट प्रदर्शन गर्दै अर्जेन्टिना समूह विजेताबन्दै कोपा अमेरिकाको अन्तिम आठमा प्रवेश गरेको छ । एकतर्फी बनेको खेलमा अर्जेन्टिनाले बोलिभियालाई ३–० ले पराजित गरेको हो ।
खेलअवधि भर अर्जेन्टिनाले झण्डै ९० प्रतिशत बल आफ्नो नियन्त्रणमा राखेको थियो ।
![](http://www.ratopati.com/wp-content/uploads/2016/06/Ck9rd8RVEAA4kXW.jpg)
अर्जेन्टिनाले सबै गोल पहिलो हाफमा गरेको थियो । अर्जेन्टिनालाई जीत दिलाउन एरिक लामेमा, एजिक्वेल लाभेज्जी र भिक्टर कुएस्टाले एक–एक गोल गरे ।
खेलको दोस्रो हाफमा लियोनेल मेस्सी पनि मैदान प्रवेश गरे पनि कुनै गोल गर्न सकेनन् । यसअघिको खेलमा भने उनले १९ मिनेटमो अन्तरालमा ह्याट्रिक गरेका थिए ।
यो जितसँगै अर्जेन्टिनाले समूह चरणका सबै खेल जितेको छ । सन् २००७ पछि समूह चरणमा यस्तो शतप्रतिशत नतिजा निकाल्ने अर्जेन्टिना पहिलो टोली बनेको छ । त्यतिबेला पनि अर्जेन्टिनाले सबै खेल जित्दै क्वाटर फाइनलमा प्रवेश गरेको थियो ।
पछिल्ला २२ कोपा अमेरिकाको खेलमा अर्जेन्टिनाले मात्र एक खेल हारेको छ । यता, बोलिभिया भने कुनै पनि अंक नजोडी प्रतियोगिताबाट बाहिरिएको छ । सन् १९६७ पछि बोलिभियाले प्रतियोगितामा लगातार चार खेल हारेको यो पहिलो अवसर हो ।
जीतपछि अर्जेन्टिना समूह विजेता बनेको छ । क्वाटरफाइनलमा अर्जेन्टिनाले भेनेजुएलको सामना गर्नेछ ।
Post a Comment