उपेन्द्र यादवको टिप्पणीः हावादारी प्रधानमन्त्रीको हावादारी बजेट !

                 'अब महंगी बढ्छ, तयार भएर बस्नुहोला'

काठमाडौं , जेष्ठ १६ गते । तराई मधेसमा आन्दोलनरत मधेसी मोर्चाका नेताहरुले सरकारले ल्याएको बजेटलाई हावादारीको संज्ञा दिएका छन् ।

अर्थमन्त्री विष्णु पौडेलले संसदमा बजेट पेश गर्दा मोर्चाका सांसदहरु अनुपस्थित थिए । उनीहरुले बजेट भाषणा बहिस्कार गरेका हुन् । बजेट प्रस्तुत भएपछि प्रतिक्रिया दिँदै मधेसी मोर्चाका शीर्ष नेताहरुले बजेटको आलोचना गरेका छन् ।

साथै संविधान निर्माणका क्रममा सरकार र नेतृत्वकर्ता दल एमालेको मधेसमा शाख गुमेको भन्दै उनीहरुले त्यसलाई फर्काउने प्रयासमा वितरणमुखी कार्यक्रम ल्याएको बताएका छन् ।

संघीय समाजवादी फोरम नेपालका अध्यक्ष उपेन्द्र यादवले महंगी बढाउने बजेट भनेका छन् । बजेटबारे अनलाइनखबरलाई प्रतिक्रिया दिँदै यादवले भने, ‘महंगी बढ्छ । तयार भएर बस्नुहोला ।’

कृषिलाई आवश्यकता अनुसार ध्यान दिन नसकेको र बन्द रहेका सरकारी उद्योग धन्दा सञ्चालन गर्नेबारे कुनै योजना नआएको भन्दै उनले भने, ‘अनि कसरी देशको विकास हुन्छ ? मुलुकको आर्थिक बृद्धिदर नकारात्मक विन्दुमा पुग्न लागेको बेला वितरणमुखी बजेट आएको भन्दै उनले भने, जनतालाई बेवकुफ बनाउने बजेट आएको छ । हावादारी प्रधानमन्त्रीको हावादारी बजेट ।’

तर, तराई मधेसका विकासका राम्रो योजनाहरु परेको छ होइन र भन्ने प्रश्नमा संघीय समाजवादी फोरमका अध्यक्ष यादवले भने, ‘हुलाकी सडकको कुरा गरेको ३०/४० वर्ष भइसक्या, फास्ट ट्र्याकको कुरा गरेको छ, फास्ट ट्र्याक बनाउने क्षमता छ यो सरकारसँग ?’

सदभावना पार्टीका अध्यक्ष राजेन्द्र महतोले बजेट हेर्दा सानदार देखिने तर, केही नभएको बताएका छन् । वितरणमुखी बजेट आएको भन्दै उनले भने, ‘मधेसमा पनि चकलेट बाँडिएको छ ।’ तराई मधेसमा गुमेको शाख फर्काउने सरकार र एमालेेले यस्ता कार्यक्रम ल्याएको उनले बताए ।

हुलाकी सडकलाई ४ अर्ब छुट्याइएको भन्दै उनले भने, चार अर्बले हुलाकी सडक बन्छ ? यो बजेट देखाउन मात्र राम्रो छ । कार्यान्वयन हुन सक्दैन र मधेसलाई पनि धोका दिइएको छ । - अनलाइन खबरबाट